Jakob er sérmenntaður á sviði útimenntunar og með doktorsgráðu frá Menntavísindasviði Háskóla Íslands í náms- og kennslufræði. Hann hefur starfað við Háskóla Íslands frá 2004 þar sem sérsvið hans er óformlegt og formlegt nám, tómstundafræði, leiðtogafræði, forvarnir, viðburðastjórnun og ýmis svið útimenntunar eins og útikennsla, útinám, útilíf og útivist. Starfið felst í kennslu, rannsóknum og þróun náms í tómstunda- og félagsmálafræði.
Doktorsverkefni Jakobs fjallaði um Möguleika útimenntunar á Íslandi: Hvernig náttúran stuðlar að staðartengdri reynslu, ígrundun og vináttu.
Starfsreynsla Jakobs, fyrir utan Háskóla Íslands, hefur m.a. verið við stjórnun og stefnumótun, við kennslu í grunnskóla, í félagsmiðstöðvum, í ferðaþjónustu, ýmiskonar menningar- og tómstundastarf og sjálfstætt við símenntun og ýmis þróunar- og ráðgjafarverkefni.
Jakob, eða Kobbi eins og hann er kallaður, hefur verið virkur í félagsstarfi og útivist m.a. í Skátum, Landsbjörg, innan Ungmennahreyfingarinnar, í siglingaklúbbnum Drangey, hjá SÍL og í foreldrafélögum. Jakob er giftur Vöndu Sigurgeirsdóttur og á þrjú börn.
Jakob reyni að haga lífi sínu þannig að það sé bæði hæglátt og kaótískt. Hann segir að það styrkir tengsl sín við sjálfan sig, annað fólk og náttúruna. Elskar útiveru og fjallgöngur en það er ekki aðal málið að komast á toppinn. Það er í ferðalaginu sem töfrarnir felast.
Jakob nýtur þess að kenna, þjálfa og læra. Hann stundar rannsóknir á sviði útimenntun sem fjalla m.a. um útiveru barna, hvernig hægt að auka útimenntun og um samspili skólastarfs, frístundastarfs og ferðaþjónustu.
Jakob hefur áorkað ýmsu í lífinu. Hann er þriggja barna faðir, leitast við að rækta vináttusambönd sín og víkka reynsluheim sinn. Hann á sínar bestur stundir í eldhúsinu – eða við eldstæðið – að ræða málin og elda gómsætan mat með vinum og vandamönnum.
