KVAN- og Umhyggjunámskeið fyrir 10-12 ára

Dagsetning:

17. september 2021, 16:00 - 5. nóvember 2021, - 18:30

Deila:
Bæta við í dagatal

Hefst 17. September
Kennt á Föstudögum kl. 16:00-18:30

Umhyggja og KVAN bjóða í samstarfi upp á spennandi og vandað námskeið fyrir 10-12 (5.-7. bekk) ára systkini langveikra barna. Námskeiðið er sérhannað og skipulagt af KVAN en starfsmenn og stjórnendur fyrirtækisins hafa mikla menntun og áralanga reynslu í námskeiðahaldi fyrir ungt fólk til að ýta undir meira sjálfstraust, bætta vináttufærni, sjálfsmynd, leiðtogahæfileika og betri líðan barna og ungmenna.

Skemmtilegt og uppbyggilegt námskeið sem aðstoðar þig við að takast á við aukinn hraða, álag, kröfur og þær félagslegu aðstæður sem ungt fólk stendur frammi fyrir í dag. Vilt þú verkfæri til að auka sjálfstraust þitt og hugrekki til að þora að standa á eigin skoðunum, bæta samskipti og leiðtogahæfni. Viltu læra aðferðir við að setja þér og öðrum mörk, t.d. þegar kemur að tölvunotkun, samfélagsmiðlum, vináttu og virðingu?

Fyrir hverja
KVAN fyrir 10-12 ára er fyrir unglinga sem eru í 5., 6. og 7. bekk í grunnskóla sem eru systkini langveikra barna og hafa áhuga á því að efla sig í námi, íþróttum, tónlist eða almennt í lífinu.

Við minnum á að ef börn og unglingar notast við stuðningsaðila í skóla þá þurfi einnig að koma með stuðning á öll námskeið okkar fyrir ungt fólk.

Hvað get ég lært
Á námskeiði KVAN ættir þú að geta fundið aukinn kraft, meira jafnvægi og aukið sjálfstraust og trú á eigin getu. Þú getur orðið meðvitaðari um eigin heilsu, bæði andlega og líkamlega og lært aðferðir til að halda góðu jafnvægi í lífinu. Saman skoðum við þau áhrif sem samfélagsmiðlar geta haft á okkur og hvernig við getum forðast neikvæð áhrif samanburðar og fullkomnunaráráttu. Við kennum árangursríkar aðferðir í vináttuþjálfun, markmiðasetningu og hjálpum þér að finna út þína helstu styrkleika og hjálpum þér að læra og skilja hvernig þú getur nýtt þá. Með því að vinna út frá styrkleikum hvers og eins eykst sjálfstraustið og viðhorfið verður allt annað og betra. Við þjálfum þig í að tala fyrir framan hóp af fólki og kennum þér einfaldar og áhrifaríkar reglur í tjáningu. Við förum í gegnum samskiptin í okkar lífi og fáum tækifæri til þess að þróa leiðtogahæfni og laða fram það besta í okkur sjálfum sem og öðrum og bætum þannig árangur okkar. Að loknu námskeiði getur þú komið auga á þína eigin kosti. Með því að styrkja sjálfstraustið ertu meðvitaðari um eigin heilsu og hefur nú verkfæri til þess að láta ekki kvíða, álag eða streitu ná tökum á þér. Þú munt kunna leiðir til að sjá lausnir en ekki vandamál, geta sett þér mörk og hvernig á að vinna í hópum. Þú munt fá tækifæri til að vera besta útgáfan af sjálfum þér.

Skipulag
Námskeiðið er kennt í 8 skipti, 3 klst. í senn, einu sinni í viku. Síðasti tíminn er eftirfylgni sem haldinn er tveimur vikum eftir 7. tíma. Þátttakendur fá handbók og fleiri verkfæri til að nota á námskeiðinu og við áframhaldandi vinnu. Námskeiðin fara fram í sal okkar að Hábraut 1a, 200 Kópavogi.

Þar sem Umhyggja niðurgreiðir langstærstan hluta kostnaðar er námskeiðsgjaldið aðeins 7.000 krónur á barn.

Námskeiðið er aðeins ætlað börnum fjölskyldna sem eru í aðildarfélögum Umhyggju. Mikilvægt er að taka fram við skráiningu í hvaða aðildarfélagi viðkomandi er en það er sett í reitinn “upplýsingar” þegar komið er í körfu.